काठमाडौं । भक्तपुरको एक घरबाट नगद र गरगहना चोरी गरी भागेको दुई जना पक्राउ परेका छन् ।

पक्राउ पर्नेमा ओखलढुंगा घर भई काठमाडौंको टेकु बस्दै आएका १९ वर्षीय राजेश भुजेल र काभ्रेपलान्चोक बनेपा नगरपालिका–६ का १८ वर्षीय समिर श्रेष्ठ रहेका छन्।

उनीहरूले शुक्रबार साँझ भक्तपुर चाँगुनारायण नगरपालिका– ३ का भुवन खत्रीको घरमा दराज फुटाई विभिन्न गरगहना र नगद चारी गरेको जिल्ला प्रहरी परिसर भक्तपुरले जनाएको छ ।

प्रहरीमा उजुरी आउनसाथ खटिएको प्रहरीले भुजेल र श्रेष्ठलाई सामानसहित पक्राउ गरेको जिल्ला प्रहरी परिसर भक्तपुरले जनाएको छ ।

उनीहरूको साथबाट सुनको चुरा ३ थान, सुनको चन्द्रमा, औठी, नेक्लेस, मुन्द्री, तिलहरी, पुतली र रानीहार १÷१ थान बरामद भएको छ ।

साथै चाँदीको पाउजु, नगद एक हजार २६६ रुपैयाँ र तालचा फुटाउन प्रयोग हुने फलामको टिनो पनि बरामद भएको छ। घटनाका विषयमा थप अनुसन्धान भइरहेको प्रहरीले जनाएको छ ।