काठमाडौं । । रामबाबु गुरुङ निर्देशित फिल्म ‘डिग्री माइला : एमए थर्ड क्लास’को पहिलो गीत ‘सुस्त सुस्त’ सार्वजनिक भएको छ ।

गीतमा फिल्मका मुख्य कलाकार दयाहाङ राई र आँचल शर्मालाई रोमान्टिक अवतारमा प्रस्तुत गरिएको छ ।

एसडी योगीको संगीत तथा दिल्लु चम्लागाईको शब्द रहेको गीतमा संगीतकार योगी र बिज्ञानी पराजुलीले स्वर दिएका छन् ।

युमी बलामीको कोरियोग्राफी रहेको गीतमा निर्देशक रेनेशा वान्तवा राईको कोरियोग्राफी निर्देशन छ ।

बाँसुरी फिल्मस्को ब्यानरमा निर्माण भएको फिल्म थर्ड डिभिजनमा मास्टर डिग्री पास गरेका एक शैक्षिक बेरोजगारको कथामा बनेको हो ।

बाँसुरी फिल्मस्ले कबड्डी फिल्मस् तथा सुस्मा फिल्मस्सँग मिलेर निर्माण गरेको फिल्ममा दयाहाङ र आँचलका अलवा विजय बराल, माओत्से गुरुङ, बुद्धि तामाङ, प्रकाश घिमिरेलगायतको अभिनय छ ।