काठमाडौं । एकदिवसीय अभ्यास शृंखलाको दोस्रो खेलमा आज नेपाल ‘ए’ ले क्यानडा-११ सँग खेल्दैछ ।

खेल बिहान साढे ९ बजे माथिल्लो मुलपानी क्रिकेट मैदानमा सुरु हुनेछ । तीन खेलको सिरिजअन्तर्गत पहिलो खेलमा नेपाल ए ४ विकेटले पराजित भएको थियो ।

नेपालले आज पहिलो खेलमा मौका नपाएका खेलाडीहरुलाई मौका दिनसक्छ । नेपाली क्रिकेटको इतिहासमा ‘ए’ टिमले खेलेको यो पहिलो शृंखला हो ।

शृंखलामा नेपाली टिमको कप्तानी विकेटकिपर ब्याटर विनोद भण्डारीले गरिरहेका छन् । यस्तै, नेपाली टिमको प्रशिक्षकमा ज्ञानेन्द्र मल्ल र कलाम अली छन् । तेस्रो तथा अन्तिम अभ्यास खेल बिहीबार हुनेछ ।

त्यसपछि आईसीसी विश्वकप लिग-२ त्रिकोणात्मक सिरिज खेल्न क्यानडा युएई जानेछ । त्रिकोणात्मक सिरिज यूएईअघि क्यानडाले नेपालमा आएर तयारी गरेको हो । क्यानडाले नेपालको सिनियर टोलीसँग तीन खेलको ओडीआई खेलेको थियो ।