काठमाडौं । रुस पठाइदिने आश्वासन दिएर ठगी गरेको आरोपमा प्रहरीले एक जनालाई पक्राउ गरेको छ ।

उदयपुरको उदयपुरगडी गाउँपालिका–९ ध्वासे फूलबारीका ३० वर्षीय मिलन तामाङ पक्राउ परेका हुन् । उनी हाल काठमाडौंस्थित स्वयम्भुमा बस्दै आएका थिए ।

उनले गणेश बिसीसहित दुई जनालाई पाँच लाख रुपैयाँ लागतमा वैदेशिक रोजगारीका लागि रुस पठाउने आश्वासन दिएका थिए । ताामाङले उनीहरूलाई रुस पुगेपछि कन्ट्रक्सनमा लेबरको काममा लगाइदिने र मासिक एक लाख रुपैयाँ तलब हुने बताएका थिए ।

त्यसका लागि उनले पीडितहरूबाट पटकपटक गरी एक लाख ६५ हजार रुपैयाँ लिएका थिए । तर, त्यसपछि उनी सम्पर्कविहीन भएको प्रहरीले जनाएको छ । काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई काठमाडौं सामाखुशीबाट पक्राउ गरेको हो ।

उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको छ ।