काठमाडौं । साविक विजेता भारतलाई हराउँदै अष्ट्रेलियाले दक्षिण अफ्रिकामा जारी आइसिसी यू-१९ विश्वकप क्रिकेटको उपाधि जितेको छ ।

भारतमा फाइनलमा ७९ रनले पराजित अष्ट्रेलियाले चौथो पटक यू-१९ विश्वकप क्रिकेटको उपाधि जितेको हो । अष्ट्रेलियाले यसअघि १९८८, २००२ र २०१० मा भएको यू–१९ विश्वकप जितेको थियो ।

आइतबार अस्ट्रेलियाले दिएको २५४ रनको लक्ष्य पछ्याएको भारत ४३.५ ओभरमा १७४ रनमा अलआउट भयो । भारतका लागि ओपनर आदर्श सिंहले ४७, अर्शिन कुलकर्नी ३, मुशीर खानले २२ र मुरुगन अभिषेकले ४२ रन बनाए ।

अन्य चार ब्याटरले दोहोरो अंकमा रन बनाउन सकेनन् । अष्ट्रेलियाका महली ब्रेडम्यान र रफ म्याकमिलनले ३-३ विकेट लिए । कोलुम भिडलरले २ विकेट लिए।

त्यसअघि दक्षिण अफ्रिकाको बेनोनीमा टस जितेर पहिले ब्याटिङ गरेको अस्ट्रेलियाले ७ विकेटको क्षतिमा २५३ रन जोडेको थियो । अष्ट्रेलियाका लागि हर्जस सिंहले ५५, ह्यारी डिक्सनले ४२, कप्तान ह्युज वेइबगेनले ४८ र ओलिभर पिकले नटआउट ४६ रनको योगदान गरे ।

बलिङमा भारतका राज लिम्बानीले ३ विकेट लिए भने नमन तिवारीले २ विकेट लिन सफल भएका थिए ।