विराटनगर । मोरङमा अपहरणमा परेका एक जना बालकलाई प्रहरीले सकुशल उद्धार गरेको छ । जहदा गाउँपालिका वडा नम्बर १ बाट मंगलबार दिउँसो ३ बजेतिर १० वर्षीय धनीधर राजवंशी अपहरणमा परेका थिए ।

विद्यालयबाट आएर घर नजिकको कोचागरा मन्दिरमा साथीहरूसँग खेल्न निस्किएका बेला उनी अपहरणमा परेका हुन् । ती बालक जहदा १ का वडाध्यक्ष बाबुराम राजवंशीका छोरा रहेको बताइएको छ ।

सो अपहरणमा संलग्न तीन जनालाई पनि जिल्ला प्रहरी कार्यालय मोरङले पक्राउ गरेको छ । पक्राउ पर्नेमा जहदा-१ का २० वर्षीय अभिषेक यादव, १९ वर्षीय मिथिलेशकुमार यादव र विराटनगर-१८ का २१ वर्षीय विवेकानन्द यादव छन् ।

इलाका प्रहरी कार्यालय रानीका प्रहरी निरीक्षक (इन्सपेक्टर) सन्दीप बेलबासे र इलाका प्रहरी कार्यालय बुधनगरका प्रहरी नायव निरीक्षक (सई) विजय बस्नेतको नेतृत्वमा खटिएको संयुक्त टोलीले विराटनगर १८ बाट बालकको उद्धार गरेको हो ।

उनीहरुले ‘भारत पुर्‍याएर बालकलाई बन्धक बनाउँदै अभिभावकसँग फिरौती रकमको ‘बार्गेनिङ’ गर्ने योजना बनाएजस्तो देखिएको अनुसन्धानबाट खुलेको छ । पक्राउ परेकामाथि प्रहरीले अनुसन्धान थालेको छ ।