काठमाडौं । प्रहरीको गोली लागेर शुक्रबार ललितपुरको बालकुमारीमा मारिएका वीरेन्द्र शाह र सुजन राउतका आफन्तले न्यायिक छानबिन समिति गठन गर्न सरकारसँग माग गरेका छन् ।

शनिबार अपराह्न प्रधानमन्त्री निवास बालुवाटार पुगी मृतकका आफन्तले प्रधानमन्त्री पुष्पकमल दाहाल प्रचण्डसँग न्यायिक छानबिन समिति गठन गर्न माग गरेका हुन् । उनीहरुले प्रहरी नेतृत्वमा बनेको छानबिन समिति नमान्ने भन्दै न्यायिक समिति गठनको माग गरे ।

मृतकका आफन्तहरुले प्रहरीको नेतृत्वमा बनेको समिति नमान्ने, दोषीमाथि कडाभन्दा कारबाही हुनुपर्ने र मृतकलाई सहिद घोषणा गर्नु माग गरेको बताइएको छ ।

यस्तै, रोजगारीमा विदेश जाने विषयको आन्दोलनमा शाह र राउतको ज्यान गएको भन्दै उनीहरूका परिवारलाई रोजगारीको व्यवस्था गर्न समेत आफन्तको माग छ ।

इपीएस परीक्षाका विषयमा शुक्रबार बालकुमारीमा प्रदर्शनका घटनामा परी जिल्ला अछाम चौरपाटी गाउँपालिका वडा नं. १ घर भई हाल काठमाडौं बस्ने वर्ष २१ का वीरेन्द्र शाह र जिल्ला दैलेख महाबु गाउँपालिका वडा नं. ६ घर भई हाल भक्तपुर बस्ने वर्ष २३ का सुजन राउतको मृत्यु भएको थियो । दुवै शव आफन्तले बुझ्न बाँकी छ ।