बारा । अवैधरूपमा भारतबाट भन्सार छलेर बिक्रीका लागि नेपाल ल्याइएका १५ लाख रुपैयाँ बराबरको मोबाइलसहित एकजना पक्राउ परेका छन् ।

जिल्ला प्रहरी कार्यालय बाराका अनुसार बारागढी गाउँपालिका वडा नं ३ खोपवा टोल बस्ने रूपन भन्ने रूपनारायण चौधरी पक्राउ परेका हुन् ।

विभिन्न कम्पनीका ५१ थान एन्ड्रोइड मोबाइल र चार्जर प्रहरीले बारागढी गाउँपालिका–३ खोपवा निवासी रूपनारायणको घरबाट बरामद गरेको हो ।

विशेष सुराकको आधारमा जिल्ला प्रहरी कार्यालय बाराबाट खटिएको प्रहरी टोलीले चौधरीको घरमा खानतलासी गर्दा विभिन्न कम्पनीका मोबाइल सेट, ४८ थान चार्जर, ब्याट्री नौ थान र मोबाइल कभर १४ थान गरी १५ लाख रुपैयाँ मूल्य बराबरको रहेको बारा प्रहरीले जनाएको छ।

चौधरीले त्यस क्षेत्रमा सस्तोमा आफ्नै घरबाट मोबाइल बिक्रीवितरण गर्दै आएको खुलेको छ । उनलाई हिरासतमा राखी प्रहरीले थप अनुसन्धान थालेको छ ।