काठमाडौं । काठमाडौं उपत्यका अपराध अनुसन्धान कार्यालयले माल्टा पठाईदिन्छु भन्दै ठगी गर्ने एक जनालाई पक्राउ गरेको छ ।

पक्राउ पर्नेमा रामेछापको तामाकोशी लिखु गाँउपालिका-२ स्थाई घर भई हाल काठमाडौं माहानगरपलिका-२६ मैपी बस्ने पोसाक सुनुवार रहेका छन् ।

सुनुवारले वैदेशिक रोजगारीको लागि माल्टा पठाई दिने भन्दै टेक बहादुर गुरुङसंग ३ लाख ३३ हजार रुपैयाँ ठगी गरेर फरार भएका थिए ।

सुनुवारले माल्टा पुगेपछि प्रतिष्ठित कम्पनीमा काम लगाई दिने र मासिक १ लाख कमाई हुने प्रलोभन देखाएर ठगी गरेको काठमाडौं उपत्यका अपराध अनुसन्धान कार्यालयले जनाएको छ ।

सुनुवारले ठगी गरेर फरार भएपछि वैदेशिक रोजगार विभागले उपत्यका अपराध अनुसन्धान कार्यालयलाई पक्राउ गरी उपस्थित गराइदिन भन्दै पत्र लेखेको थियो ।

पत्र पाए लगत्तै उपत्यका अपराध अनुसन्धान कार्यालयबाट खटिएको प्रहरी टोलीले सुनुवारलाई आज मैपीबाट पक्राउ गरेको हो ।

पक्राउ परेका सुनुवारलाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाईएको पनि प्रहरीले जनाएको छ ।