काठमाडौं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले भ्रष्टाचार एउटा गम्भीर अपराध भएको बताएका छन् ।

भ्रष्टाचार विरुद्दको संयुक्त राष्ट्रसङ्घीय महासन्धिका पक्ष राष्ट्रको दशौँ सम्मेलनलाई सम्बोधन गर्दै प्रमुख आयुक्त राईले यस्तो बताएका हुन् ।

उनले भ्रष्टाचार एउटा गम्भीर अपराध भएको र यसले विकासलाई कमजोर बनाउँदै सरकार प्रतिको विश्वसनीयता घटाउने बताए । उक्त सम्मेलन भ्रष्टाचारविरुद्ध लड्न राज्यको सामूहिक सङ्कल्पको सङ्केत गर्ने महत्त्वपूर्ण क्षण भएको उनको भनाई छ ।

प्रमुख आयुक्त राईले नेपाल भ्रष्टाचार नियन्त्रणको लागि दृढसङ्कल्पित रहेको र यसविरुद्ध शून्य सहनशीलताको नीति अवलम्बन गरेको उल्लेख गर्दै भ्रष्टाचार नियन्त्रणको लागि प्रवर्द्धनात्मक एवं दण्डात्मक उपाय अवलम्बन गरिएको जानकारी दिए ।