काठमाडौं । नेपालमा कोरोना भाइरस संक्रमणबाट थप २ जनाको मृत्यु भएको छ । मृत्यु हुनेमा पर्साकी १८ वर्षीया किशाेरी र पर्साकै अर्का ४६ वर्षीय पुरुष रहेका स्वास्थ्य तथा जनसंख्या मन्त्रालयले जनाएकाे छ । योसँगै नेपालमा कोरोना भाइरसबाट मृत्यु हुनेको संख्या ६० पुगेको छ ।

मृत्यु हुनेमा पर्सा जिल्ला पोखरिया नगरपालिका वडा नं ९ निवासी १८ वर्षीया किशाेरी रहेकी छिन् । उनको साउन १९ गते सोमवार मृत्यु भएको हो । झाडापखालाको कारण सिकिस्त बिरामी उनलाई नेशनल मेडिकल कलेज वीरगञ्जमा उपचारको लागि लैजाने क्रममा मृत्यु भएको हो । कोरोना संक्रमणको आशंकामा नारायणी अस्पतालको प्रयोगशालामा गरिएको परीक्षणमा उनमा कोरोना पुष्टि भएको हो ।

त्यस्तै पर्सा जिल्ला वीरगञ्ज महानगरपालिका ५ बस्ने वर्ष ४६ का पुरुषको पनि कोरोनाको कारण मृत्यु भएको हो । उनको आज बिहान ६ बजे अस्थायी कोभिड अस्पतालमा निधन भएको मन्त्रालयका प्रवक्ता जागेश्वर गौतमले जानकारी दिए ।