काठमाडौं । नेपाल कम्युनिस्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहालबीच बालुवाटारमा भएको वार्ता विना निष्कर्ष टुंगिएको छ ।

पार्टीभित्र चर्किएको विवाद समाधानका लागि प्रधानमन्त्रीसमेत रहेका नेकपा अध्यक्ष ओली र अर्का अध्यक्ष दाहालबीच आज प्रधानमन्त्री निवास बालुवाटारमा करिब सवा घण्टा भएको वार्तामा दुवै पक्षले आ–आफ्नै अडान राखेका कारण वार्ता निश्कर्षमा पुग्न नसकेको हो ।

‘ओली स्थायी कमिटी बैठक राख्न तयार देखिनुभएन, हामीले स्थायी कमिटी बैठकबाट समाधान खोजौँ भन्ने अडान छाडेनौ’, बैठकमा सहभागी नेता झलनाथ खनालले भने, ‘त्यही भएर वार्ता सकारात्मक र सहमति हुन सकेन ।’

बैठकमा सहभागी अर्का एक नेताका अनुसार सरकारले लगानी बोर्डको प्रमुख कार्यकारी अधिकृत (सीईओ)मा सुशील भट्टलाई नियुक्ति गरेकोमा अध्यक्ष दाहाल र वरिष्ठ नेता झलनाथ खनालले आपत्ति जनाएका थिए ।

विवादित व्यक्तिलाई नियुक्ति दिएको भन्दै दाहाल र खनालले आपत्ति जनाएपछि केहीबेर चर्काचर्की नै भएको थियो । उनीहरुले आपत्ति जनाएपछि ओलीले अबदेखि कुनैपनि नियुक्ति गर्दा पार्टीको निर्णय र परामर्शमा मात्रै गर्ने जवाफ दिएका बताईएको छ । आजको वार्ता पनि सहमतितर्फ नगएपछि भोलि पनि सहमतिको लागि प्रयासमा नेताहरू रहनेछन् ।