काठमाडौं । नेपाली कांग्रेसले भूकम्प प्रभावित क्षेत्र जाजरकोट र रूकुम पश्चिममा तत्काल राहत र उद्धारको काम तदारुकताका साथ पुर्‍याउन अपिल गरेको छ ।

पार्टी सभापति शेरबहादुर देउवाले शनिबार बिहान एक विज्ञप्ति जारी गर्दै उक्त अपिल गरेका हुन् ।

‘भूकम्पबाट प्रभावितहरुलाई सुरक्षित स्थल तर्फ तत्काल स्थानान्तरण गर्न, युद्धस्तरमा उद्धारको कार्य गर्न, घाइतेहरुको उपचार र राहतको कार्यमा सक्रियता साथ परिचालन गर्न प्रधानमन्त्री लगायत नेपाल सरकारसँग जोडदार माग गर्दछु,’ विज्ञप्तिमा उल्लेख छ ।

सभापति देउवाले नेपाली कांग्रेसको सम्पूर्ण पार्टी निकायलाई भूकम्प प्रभावित क्षेत्रमा उद्धार, राहत र पुर्ननिर्माणमा जुट्न निर्देशन पनि दिएका छन् ।

गएराति जाजरकोटमा गएको ६.४ म्याग्निच्युडको भूकम्पका कारण जाजरकोट र रुकुम (पश्चिम) लगायतका क्षेत्रमा ठूलो संख्यामा मानवीय क्षति भएको छ।