झापा । नेपाली नागरिकतासहित भारत प्रवेश गरेका चिनियाँ नागरिकलाई पक्राउ गरिएको छ । नेपाल भारतको सीमा नाका काँकडभिट्टा हुँदै भारतको पानीटंकी बजार पुगेका चिनियाँ नागरिक ली शियाकाङ पक्राउ परेका हुन् ।

यस्तै उनलाई सहयोग गरेको आरोपमा सञ्जीव सुयाल र चित्र गुप्ता अधिकारीलाई पनि भारतीय एसएसबीले पक्राउ गरेको छ । उनीहरू गाडी चढेर शुक्रबार दिउँसो भारत गएका थिए ।

सीमामा तैनाथ एसएसबी ४१औँ बटालियनका टोलीले आवश्यक कागजपत्र माग्दा चिनिया नागरिक शियाकाङले नेपाली नागरिकताको फोटो कपी देखाएका थिए ।

तर उनले कसको नागरिकताको फोटोकपी देखाएको भन्ने कुरा खुलेको छैन । प्रहरीले तीनै जनालाई सिलिगुडी अदालतमा पेस गरेको छ । घटनाबारे भारतीय प्रहरीले थप अनुसन्धान थालेको बताइएको छ ।