मकवानपुर । प्रहरीले अवैध लागूऔषध कारोबार गर्ने पाँच जनालाई नगदसहित पक्राउ गरेको छ ।

प्रहरीले मकवानपुरको मनहरी गाउँपालिका–६ नयाँबस्तीबाट नगद ८ लाख रुपैयाँ र प्रतिबन्धित अवैध लागूऔषधसहित ५ जनालाई नियन्त्रणमा लिएको हो ।

पक्राउ पर्नेमा कैलाश गाउँपालिका–८ का ३१ वर्षीय विकास मोक्तान, ३५ वर्षीय रामबहादुर स्याङ्बो, मनहरी गाउँपालिका–४ रमनटारका ३० वर्षीय रामचन्द्र गोले, २० वर्षीय दलबहादुर मोक्तान र पर्सा जिल्लाको ठोरी गाउँपालिका–८ का ३२ वर्षीय जीतबहादुर चापागाईं रहेका छन् ।

मकवानपुर प्रहरीका अनुसार नयाँबस्तीस्थित कुमार मोक्तानको घर अगाडि बाटोमा रोकिरहेको प्रदेश ३–०३–००१ प ४५४१ नम्बरको मोटरसाइकललाई जाँच गर्दा ३ वटा बोरा र कालो कपडाको झोलामा लागूऔषध फेला पारेको थियो ।

मोटरसाइकलबाट कोडिन फोस्पेट ओनरेक्स ६०२ बोतल, चरेस २० ग्राम र ८ लाख नगद फेला पारेको प्रहरीले जनाएको छ । नियन्त्रणमा लिइएकाहरुमाथि अनुसन्धान भइरहेको मकवानपुर प्रहरीले जनाएको छ ।