काठमाडौं । विद्यालय शिक्षा विधेयकविरुद्ध नेपाल शिक्षक महासंघको अगुवाइमा भइरहेको आन्दोलमा हस्ताक्षेप गरे प्रतिवाद गर्ने चेतावनी दिएको छ ।

काठमाडौं महानगरपालिकाले महानगरका सामुदायिक विद्यालयहरुलाई बन्द गर्ने प्रधानाध्यापक र हाजिर नगर्ने शिक्षकहरुलाई कारबाही गर्ने सूचना जारी गरेको केहीबेरपछि नै महासंघले प्रतिवाद गर्ने चेतावनी दिएको हो ।

महासंघले विज्ञप्ति जारी गर्दै आन्दोलनमा सहभागी भएबापत कोही कसैले कारबाही गरेमा महासंघले सामूहिक रुपमा प्रतिवाद गर्ने जनाएको छ ।

विज्ञप्तिमा भनिएको छ,‘संसद र कर्मचारी संयन्त्रले बनाएका गलत र प्रतिगामी नीति र रबैयाले सार्वजनिक शिक्षा ध्वस्त हुँदै जाने र यसको दोष चाहिँ सधैं शिक्षकले बोक्नुपर्ने नियतिको हामी सदाको लागि अन्त्य गर्न चाहन्छौं र यसको लागि यस पटकको आन्दोलन निर्णायक र अन्तिम बनाउन चाहन्छौं।’

महासंघले आन्दोलनको समयमा छुटेका पढाइ आन्दोलनको सफलतापछि अतिरिक्त कक्षाहरुबाट परिपूर्ति गरिने प्रतिवद्धता पनि व्यक्त गरेको छ ।

महासंघले यसअघि नै विभिन्न २० वटा माग अघि सार्दै सडक आन्दोलनका कार्यक्रमहरू घोषणा गरेको थियो। सोही घोषणाअनुसार शिक्षकहरू आन्दोलनमा उत्रिएका छन् ।