काठमाडौं । ललितानिवास जग्गा किर्ते मुद्दामा प्रतिवादीका तर्फबाट बहस आज पनि जारी रहने भएको छ । काठमाडौं जिल्ला अदालतमा आइतबारदेखि थुनछेक बहस जारी छ ।

ललितानिवास जग्गा किर्ते मुद्दामा पक्राउ परेका १८ जना थुनामा छन् । भदौ ११ देखि १५ गतेसम्म उनीहरूको बयान लिइएको थियो । त्यसपछि सरकारी वकिलले बहस सुरु गरेका थिए । सोमबारदेखि प्रतिवादीतर्फको बहस सुरु भएको थियो ।

नेपाल प्रहरीको केन्द्रीय अनुसन्धान ब्युरो (सीआईबी) ले ५७ दिन लामो अनुसन्धान गरी प्रतिवेदन बुझाएपछि सरकारी वकिल कार्यालय काठमाडौंले भदौ १० गते सरकारी छाप किर्तेमा मुद्दा चलाएको थियो ।

ललितानिवास जग्गा प्रकरणमा मृत्यु भइसकेका २१ सहित ३१० जनालाई प्रतिवादी बनाइएको छ ।