मलेखु । पृथ्वी राजमार्गमा बस दुर्घटनाको क्रममा घाइते भएका १३ जनालाई उपचारका लागि काठमाडौं लगिएको छ । उनीहरुको गजुरी सामुदायिक अस्पतालमा उपचार हुन नसकेपछि उपचारका लागि काठमाडौं पठाइएको हो ।

दुर्घटनामा घाइतेमध्ये भएका चार जनाको गजुरी सामुदायिक अस्पतालमा उपचार भइरहेको इलाका प्रहरी कार्यालय गजुरीले जनाएको छ ।

बुधबार बिहान काठमाडौंबाट म्याग्दीको बेनी जाँदै गरेको धवलागिरी यातायातको प्रदेश ३-०१-००५ ख ९९५२ नम्बरको बस धादिङको गजुरी नजिकै दुर्घटना हुँदा कम्तीमा ८ जनाको मृत्यु भएको छ ।

घटनास्थलमा अहिले उद्धार भइरहेको छ । बस नदीमा खसेको हुँदा केही बगेको र केही यात्रु बसमै च्यापिएको हुनसक्ने प्रहरीको अनुमान छ ।