काठमाडौं । भक्तपुरको सानोठिमीस्थित बालसुधार गृहमा बालकको मृत्युको घटनालाई लिएर तनाव सृजना भएको छ । सुधार गृहमा बालबालिकाहरुले बाहिर निस्केर प्रदर्शन गरेपछि तनाव उत्पन्न भएको भएको हो ।

बाल सुधार गृहमा रहेका कमल बस्नेतको समयमा नै उपचार नपाएको मृत्यु भएको भन्दै बालबालिकाहरुले प्रदर्शन गरेका थिए । सो क्रममा बाल सुधार गृहभित्रबाट सुरक्षाकर्मीमाथि ढुंगामुढा भएपछि स्थिति नियन्त्रणमा लिने क्रममा झडप भएको थियो ।

झडपका क्रममा ८ जना सशस्त्र प्रहरी, ७ जना प्रहरी र ६ जना बाल सुधार गृहमा रहेका बन्दीहरू घाइते भएको भक्तपुरका सहायक प्रमुख जिल्ला अधिकारी एवं सूचना अधिकारी डोरेन्द्र निरौलाले जानकारी दिए । बाल सुधारगृहमा २९७ जना रहेकोमा २२१ जना प्रदर्शन गर्दै बाहिर निस्किएका थिए ।

आइतबार उक्त सुधारमा बस्नेतको मृत्यु भएपछि उनका आफन्तले गेटमा प्रदर्शन गर्नुका साथै तोडफोडसमेत गरेका थिए । बाल सुधारगृहबाट भागेका २२१ जनामध्ये १९४ जना सम्पर्कमा आइसकेको छन् भने २७ जना सम्पर्कमा आउन बाँकी रहेको प्रहरीले जनाएको छ ।