काठमाडौं । जिल्ला प्रहरी परिसर काठमाडौंले आर्थिक वर्ष २०७९/८० र २०८०/८१ साउन महिनाको कार्य सम्पादन बिवरण सार्वजनिक गरेको छ ।

आर्थिक वर्ष २०७९/०८० र २०८०/०८१ साउन महिनाको कार्य सम्पादनको तुलनात्मक प्रस्तुतिका लागि शुक्रवार जिल्ला प्रहरी परिसर काठमाडौंले पत्रकार सम्मेलन गरेको हो।

जिल्ला प्रहरी परिसर काठमाडौंका अनुसार गत आर्थिक वर्षको साउन महिनाभन्दा चालु आर्थिक वर्षको साउन महिनामा आपराधिक घटनामा वृद्धि भएका छन् । साउन महिनामा २ हजार ६५१ जना मानिसहरु जिल्ला प्रहरी परिसर काठमाडौंको सम्पर्कमा आएका छन् भने २ हजार २८२ जनाले टेलिफोन सेवा लिएका छन् ।

कालीमाटी क्षेत्रमा सोल्टी होटलको सहयोगमा १८ वटा सिसिटिभी जडान गरिएको र हिरासतमा पुस्तकालय राख्ने सम्बन्धमा प्रहरी वृत्त बालाजु, बौद्ध, लैनचौर, सिंहदरबार र कालीमाटीको हिरासत कक्षमा पुस्तकालयको व्यवस्था गरिएको जिल्ला प्रहरी परिसर काठमाडौंका प्रवक्ता एसपी कुमोद ढुङ्गेलले बताए ।

त्यस्तै, २०७९/०८० साउन र २०८०/०८१ साउनको महिनाको अपराधको कसुरमा बैंकिङ कसुर मुद्दामा २०७९/०८० साउनमा ५१६ मुद्दा दर्ता भएको जसमा ८१ जना पक्राउ परेकोमा २०८०/०८१ मा मुद्दा दर्ता संख्या ५६० रहेकोमा पक्राउ संख्या २१२ रहेको प्रवक्ता ढुंगेलले बताए ।

उनले अघिल्लो आर्थिक वर्ष साउनको तुलनामा ४४ वटा मुद्दा दर्ता संख्या बढेको र पक्राउ पर्नेको संख्या पनि बढेको बताए । प्रवक्ता ढुंगेलका अनुसार अभद्र व्यवहारमा मुद्दा दर्ता २३८ भएकोमा पक्राउ पर्नेको संख्या ३६९ र २०८०/०८१ को साउन महिनामा २७९ मुद्दा दर्ता भएकोमा ४३४ जना पक्राउ परेका छन् ।

त्यस्तै चोरी सम्बन्धी कसुरमा चालु आर्थिक वर्षको साउनमा ५५ मुद्दा दर्ता भएकोमा ८२ जना पक्राउ परेका छन् । ठगी सम्बन्धी मुद्दामा चालु आर्थिक वर्षको साउनमा ३५ मुद्दा दर्ता भएकोमा १२ जना पक्राउ परेका छन् । प्रवक्ता ढुंगेलका अनुसार लागूऔषध मुद्दामा गत आर्थिक वर्षमा ३० मुद्दा दर्ता भएकोमा ३८ जना पक्राउ गरेको र चालु आर्थिक वर्षको साउनमा ३१ मुद्दा दर्तामा ५१ जना पक्राउ परेका छन् ।

आत्महत्या सम्बन्धी कसुरमा गत आर्थिक वर्षको साउनमा २६ मुद्दा दर्ता हुँदा पक्राउ संख्या शून्य र चालु आर्थिक वर्षको साउनमा आत्महत्या सम्बन्धी कसुर बढेर ३७ मुद्दा दर्ता भएका छन् भने पक्राउ कोही पनि परेका छैनन् ।

त्यस्तै जबरजस्ती करणीमा गत आर्थिक वर्षको साउनमा २० मुद्दामा २१ जना पक्राउ र यस आर्थिक वर्षको साउनमा ३३ मुद्दा दर्तामा ३४ जना पक्राउ परेका छन् । त्यस्तै जुवा सम्बन्धी मुद्दा गत आर्थिक वर्षको साउनमा १५ वटा मुद्दा दर्ता भई १०१ जनालाई पक्राउ गरेकोमा चालु आर्थिक वर्षको साउनमा १७ वटा मुद्दा दर्ता भएको छ । साथै पक्राउ पर्नेहरुको संख्या ११३ छ ।

त्यस्तै अन्य अपराधमा गत आर्थिक वर्षको साउन महिनामा ८१ वटा मुद्दा दर्ता भएको थियो भने पक्राउ संख्या ३१ थियो । चालु आर्थिक वर्षको साउन महिनामा अन्य अपराधमा ११९ वटा मुद्दा दर्ता भएकोमा १७८ जना पक्राउ परेका छन् ।

गत आर्थिक वर्षको साउन महिनामा १ हजार ४७ मुद्दा दर्ता भएकोमा ७४१ जना पक्राउ परेका थिए भने चालु आर्थिक वर्षको साउन महिनामा १ हजार २७५ मुद्दा दर्ता भएकोमा पक्राउ पर्नेहरुको संख्या ७६० जना पुगेको प्रवक्ता ढुंगेलले बताए ।