काठमाडौं । नेपाली कांग्रेसका नेता प्रदीप गिरिको स्मृतिमा गर्न लागेको भनिएको लोक एवम् लोकतन्त्र सेतु गाथा काठमाडौँ-काशी यात्रामा परिवारले आपत्ति जनाएको छ ।

कार्यक्रमका आयोजकले गिरिको पहिलो वार्षिकीमा २ देखि ५ भदौसम्म सो कार्यक्रम आयोजना गर्न लागिएको सार्वजनिक गरेको थियो । लगत्तै परिवारको तर्फबाट प्रेस विज्ञप्तिमार्फत कार्यक्रमप्रति आपत्ति जनाइएको हो ।

गिरिका अनुयायी कन्चन झालगायत कांग्रेस नेताहरुले गर्न लागेको यात्राका बारेमा समाचार र सामाजिक सञ्जालबाट थाहा पाएको र परिवारलाई जानकारीसमेत नदिई गिरिको अस्तु विसर्जन गर्नेसम्मका कार्यक्रम राखिएको भन्दै गिरिकी पत्नी भारती सिलवाल गिरिसहित परिवारले आपत्ति जनाएको छ ।

उनीहरुले बिहीबार विज्ञप्ति जारी गर्दै परिवारजनसँग सरसल्लाहसमेत नगरी र अनुमति नलिई त्यस्तो कार्य गर्न लागिएकोप्रति असहमति जनाउँदै परिवारसँग जोडिएको स‌वेदनशील विषयमा गैरकानुनी ढ‌ंगले अशोभनीय क्रियाकलाप हुन लागेको घटनाले दुखित बनाएको बताएका छन् ।

परिवारले त्यस्तो कार्यक्रम नगर्न पटक-पटक मौखिक र लिखित आग्रह गर्दा पनि अटेर गरिएको स्पष्ट पार्दै कार्यक्रमको बहानामा चन्दा उठाउने कार्य भइरहेकोसमेत विज्ञप्तिमा उल्लेख गरेको छ। परिवारले सो कार्यमा आफूहरुको असहमति रहेको र संलग्नता नरहेको समेत स्पष्ट पारेको छ ।