काठमाडौं । राष्ट्रिय स्वतन्त्र पार्टीले ७ वटै प्रदेशमा अनुशासन आयोग गठनका लागि पदाधिकारी र सदस्यहरू माग गरेको छ ।

पार्टी सदस्य र विभिन्न तहगत संरचनामा रहेका पदाधिकारीहरूलाई अनुशासित, मर्यादित बनाउन भन्दै सातै प्रदेश र जिल्ला समितिमा समेत अनुशासन आयोग बनाउन लागेको हो ।

पार्टीको विधान, सिद्धान्त, दर्शन, प्रतिवद्धता र उद्देश्य बमोजिमका कार्यहरूमा हुनसक्ने अवरोध, विसंगति तथा आर्थिक अनियमितता निर्मुल पार्न अनुशासन आयोग बनाउन लागिएको बताइएको छ । पार्टी सदस्यता लिएकामध्येबाट खुला आवेदन माग गरी पदपूर्ति गरिने छ ।

‘पार्टीका सदस्य एवं पदाधिकारीहरूलाई असल, आचरणयोग्य बनाउन साथै अनुशासन र आचरण उल्लङ्घन गरेको अवस्थामा अनुसन्धान गर्ने, प्रमाण संकलन गर्ने र सजाय गर्न पार्टी विधान २०७९ को धारा ५५ (५) च को अधिनमा रही केन्द्रीय अनुशासन आयोग नियमावली, २०८० जारी भएको हुँदा उक्त नियमावलीको अधिनमा रही यस पार्टीको सदस्य लिएकाबाट पदपूर्ति गरिने छ,’ रास्वपाको सूचनामा भनिएको छ।

रास्वपाको नियमावलीअनुसार प्रदेश अनुशासन आयोग ५ सदस्यीय हुने छ ।