काठमाडौं । नेपाली कांग्रेस प्रतिनिधिसभा संसदीय दलका प्रमुख सचेतक रमेश लेखकले सांसद सुनिल शर्मा पक्राउ पर्नुको कारण थाहा पाएपछि पार्टीको धारणा सार्वजनिक गर्ने बताएका छन् ।

सभापति शेरबहादुर देउवाको निवास धुम्बाराहीमा बिहीबार अपराह्न बसेको संसदीय दल कार्यसमिति बैठकमा सांसद शर्मा पक्राउ भएकोबारे कुराकानी भएको थियो । बैठकपछि प्रमुख सचेतक रमेश लेखकले सांसद शर्मालाई पक्राउ गरेको विषय जानकारीमा रहेको बताएका हुन् ।

तर के मुद्दामा सांसद शर्मा पक्राउ परेका हुन् भन्नेबारे आफूहरूलाई जानकारी नभएको उनको भनाइ छ । उनले भने, ‘सांसद पक्राउको विषयमा हामीलाई भर्खरै जानकारी प्राप्त भएको छ । किन, के कारणले पक्राउ गरिएको हो भन्ने विषयमा हामी जानकारी लिइरहेका छौं । कारण थाहा पाएपछि हामी धारणा सार्वजनिक गर्छौं ।’

सांसद शर्मालाई नेपाल प्रहरीको केन्द्रीय अनुसन्धान ब्युरो (सीआईबी) ले नक्कली शैक्षिक प्रमाणपत्र रहेको आरोपमा पक्राउ गरेको थियो ।