काठमाडौं । ग्लोबल टी–२० क्यानडा लिगमा सन्दीप लामिछानेसम्मिलित सरे जग्वार्सले आफ्नो चौथो खेलमा मिसिसौगा प्यान्थर्सको सामना गर्दैछ ।

जग्वार्स र प्यान्थर्सबीचको खेल शनिबार राति १ः४५ बजे सुरु हुनेछ । जग्वार्स दोस्रो जितको खोजीमा छ । जग्वार्स पहिलो खेलमा मोन्ट्रियल टाइगर्ससँग ५ विकेटको हार बेहोरेको थियो ।

दोस्रो खेलमा ब्राम्पटन वुल्भ्ससँग वर्षाका बाधक बनेपछि अंक बाँडेको जग्वार्सले तेस्रो खेलमा टोरन्टो नेशनललाई २० रनले हराएको थियो ।

प्यान्थर्सले ४ खेल खेल्दा सबैमा हारको सामना गरेको छ । प्यान्थर्समा क्रिस गेल, सोयब मलिक, क्यामरन डेलपोर्ट, जिमी नीशम, उस्मान कादिरलगायत नाम चलेका खेलाडी छन् ।

यस्तै, जग्वार्समा सन्दीपसहित एलेक्स हेल्स, लिटन दास, बेन कटिङ, इफ्तिखर अहमद, मोहम्मद हरिसलगायत स्टार छन् । जारी लिगमा सन्दीपले उत्कृष्ट प्रदर्शन गरिरहेका छन् । उनले खेलमा पूरा बलिङ गर्न पाउँदा उत्कृष्ट इकोनमीमा ४ विकेट लिएका छन् ।