काठमाडौं । नेपाली कांग्रेसका केन्द्रीय सदस्य प्रदीप पौडेलले उम्मेदवार चयन गर्दा अनिवार्य प्राइमरी इलेक्सनको व्यवस्था गर्नुपर्ने बताएका छन् ।

केन्द्रीय कार्यसमितिको शुक्रबारको बैठकमा बोल्दै नेता पौडेलले यस्तो प्रस्ताव गरेका हुन् । पौडेलले सभापति चुन्न पार्टीका सबै क्रियाशील सदस्यले मत दिने व्यवस्था गर्न प्रस्ताव गरे ।

पौडेलले भने,‘कांग्रेस संकटमा छ भन्ने मानेर कसैको दाइ, भाइ र अनुयायी नभई आत्ममूल्यांकन गर्न जरूरी छ । पार्टीलाई सुधार गर्न जरूरी छ, सर्जरीकै आवश्यकता छ।’

उनले अहिले कांग्रेस संकटको अवस्थामा रहेको भन्दै आत्ममूल्यांकन गरेर सुधारतर्फ अघि बढ्नुपर्ने भन्दै सुझावहरु राखे । लामो समयदेखि पार्टीमा भएका विभिन्न घटनाले पलायनता, निष्कृयता र विद्रोहको मानसिकता देखिन थालेकोले यो स्थिति अन्त्य गर्नुपर्ने उनले बताए।

उनले पार्टीलाई रूपान्तरण गरेर लैजानुपर्ने बताए। त्यसका लागि महामन्त्रीहरूले पेश गरेको एजेन्डा मात्र पर्याप्त नहुने उल्लेख गरेका छन्।