काठमाडौं । पत्नीशोकमा रहेका प्रधानमन्त्री पुष्पकमल दाहाल ‘प्रचण्ड’लाई समवेदना दिन एमाले संसदीय दलको टोली प्रधानमन्त्रीको सरकारी निवास बालुवाटार पुगेको छ ।

शुक्रबार समवेदना व्यक्त गर्न एमाले संसदीय दल उपनेता सुवास नेम्बाङको नेतृत्वमा प्रतिनिधिसभा र राष्ट्रिय सभा सांसदहरु पुगेका हुन् ।

उनीहरुले प्रधानमन्त्रीकी दिवंगत पत्नी सीता दाहालप्रति फूल चढाउँदै श्रद्धाञ्जली अर्पण गरे ।

त्यसअघि एमाले उपाध्यक्षहरू सुवास नेम्वाङ र विष्णु पौडेल, सचिवहरू पृथ्वीसुब्बा गुरुङ र गोकर्ण विष्ट, राष्ट्रियसभा सांसद विमला राई पौड्याललगायत नेताहरू बालुवाटार पुगेका थिए । उनीहरुले प्रचण्डको परिवारसँग समवेदना साझा गरेका थिए ।

प्रधानमन्त्री प्रचण्ड पत्नी दाहालको ६९ वर्षको उमेरमा बुधबार निधन भएको थियो ।