काठमाडौं । वैदेशिक रोजगार विभागबाट श्रम स्वीकृति लिएर कुवेत हिँडेका ११७ जना नेपाली कामदारलाई त्रिभुवन अन्तर्राष्ट्रिय विमानस्थलको अध्यागमन कार्यालयले आइतबार फर्काईदिएको छ ।

म्यानपावर कम्पनीमार्फत विभिन्न कम्पनीहरुमा काम गर्न भन्दै श्रम स्वीकृति लिएपनि अध्यागमनले अनौपचारिक रुपमा सोधपुछ गर्दा विदेशमा घरेलु श्रमिकका रुपमा लैजान लागेको देखिएको भन्दै फर्काएको हो ।

बुधबार साँझ सलाम एयरमार्फत कुवेत जान लागेका १०१ जना र बिहीबार बिहान कुवेत एयरमार्फत कुवेतमा जान लगेका १६ जना श्रमिकलाई भिसा शंकास्पद रहेको भन्दै विमानस्थलबाट फर्काएको अध्यागमन विभागमा महानिर्देशक झलकराम अधिकारीले बताए ।

स्रोतका अनुसार इन्डेक्स म्यानपावरबाट ४७, युथ म्यानपावरबाट ३२ र निलकलम एचआरबाट २४ जना, सुलभ म्यानपावरमार्फत ४ जना श्रमिकले कुवेतको भिसा लगाएर श्रम स्वीकृति पाएका थिए । जसमध्ये करिब आधा जति महिला पनि छन् ।