मकवानपुर । प्रहरीले भारतीय रकमसहित एक जनालाई पक्राउ गरेको छ ।

मकवानपुरको रातोमाटेबाट ३ लाख ७५ हजार भारतीय रुपैयाँसहित एक जनालाई पक्राउ गरेको हो । पक्राउ पर्नेमा भारत बेतियाथाना बैरिया ग्राम मियापुर दवौली–७ बस्ने वर्ष ४० को रमेश साह गुप्ता रहेका छन् ।

रातोमाटेस्थित पूर्वपश्चिम राजमार्ग अन्तर्गतको सडक खण्डमा सवारी साधनहरु रोकी चेकजाँच गर्ने क्रममा काठमाडौंबाट वीरगञ्जतर्फ आउँदै गरेको प्रदेश ३–००१ ख २५१६ नम्बरको यात्रुवाहक बसमा सवार गुप्ताले लुकाई छिपाइ ल्याएको अवस्थामा सो रकम फेला परेको हो ।

गुप्ताले आफ्नो कम्मरको भागमा कपडाले बेरी लुकाई छिपाई गरी ल्याएको अवस्थामा उक्त रकम फेला परेको जिल्ला प्रहरी कार्यालय मकवानपुरले जनाएको छ ।

उक्त रकमसहित गुप्तालाई नियन्त्रणमा लिई आवश्यक कार्वाहीको लागी राजश्व अनुसन्धान कार्यालय पथलैया बारा पठाइएको छ।