पोखरा । गएरातिदेखि अविरल परेको वर्षाका कारण कास्की जिल्लाको माछापुच्छ्रे गाउँपालिका–८, खोरामुखमा पहिरो जाँदा ३ जनाको मृत्यु भएको छ ।

जिल्ला प्रहरी कार्यालय कास्कीका अनुसार स्थानीय प्रेम विकको घरमा पहिरो खस्दा १६ वर्षीय कुशल विक, १४ वर्षीय समीर विक र १६ वर्षीया रोजिना विकको ज्यान गएको हो । मृतक तीनै जना प्रेम विकका नातिनातिनी हुन् ।

सुरक्षाकर्मी तथा स्थानीयवासीले पहिरोमा पुरिएका तीनै जनाको शव बाहिर निकालेका थिए। घरको २०० मिटर माथिबाट झरेको पहिरोले घर बगाएको हो।

प्रेम विक र उनकी श्रीमती भने सकुशल रहेको प्रहरीले जनाएको छ । उनले प्रेम विकको बुहारी छोरीसहित माइत गएकाले उनीहरु बाँच्न सफल भएको पनि कास्की प्रहरीले जनाएको छ ।