काठमाडौं । उद्योग वाणिज्य तथा आपूर्ति मन्त्रालयले यस वर्षको वर्षायाममा नेपालमा खाद्यान्नको अभाव नहुने जनाएको छ ।

मन्त्रालयले देशभर रहेका सरकारी गोदाममा पर्याप्त मात्रामा खाद्यान्नको मौज्दात रहेको तथा थप खाद्यान्न खरिद र ढुवानी प्रक्रिया चलिरहेको भन्दै अभाव नहुने दाबी गरेको हो ।

खाद्य व्यवस्था तथा व्यापार कम्पनीका अनुसार हाल काठमाडौं उपत्यका तथा तराईका जिल्लाहरुमा ३६ हजार ३ सय ५६ क्वीन्टल खाद्यान्न मौजाद छ । त्यस्तै अति दुर्गम तथा दुर्गम जिल्लाहरुमा २५ हजार ५ सय ५ क्वीन्टल खाद्यान्द मौजाद रहेको खाद्य व्यवस्था तथा व्यापार कम्पनीको तथ्याङ्क छ ।

प्रतिस्पर्धाको माध्यमबाट खुला बजारबाट थप खाद्यान्न खरिद भइरहेको र थप चामल खरिदका लागि बोलपत्र आह्वान गर्ने प्रक्रिया पनि जारी रहेको छ ।

हाल २६ हजार ३ सय ७५ क्वीन्टल धान मौजाद छ । खाद्य व्यवस्था तथा व्यापार कम्पनीसँग मात्रै २ लाख ६६ हजार ३ सय क्वीन्टल खाद्यान्न मौजाद रहेको जनाईएको छ ।