काठमाडौं । काठमाडौं महानगरका हलमा कुनै पनि हिन्दी फिल्म चल्न नदिने मेयर बालेन शाहको निर्णयमा साथ दिन नेकपा एमालेका नेता भीम रावल आह्वान गरेका छन् ।

काठमाडौं महानगरपालिकाका प्रमुख शाहले फिल्मको विवादित अंश भारतीय फिल्मबाटै नहटाएसम्म काठमाडौंमा प्रदर्शन गर्न नदिने निर्णय गरेका थिए । सो निर्णय सबै देशभक्त नेपालीले समर्थन गर्न नेता रावलले आह्वान गरेका हुन् ।

नेपालको सांस्कृतिक अतिक्रमणविरुद्ध उचित भएकाले त्यसमा सबै देशभक्त नेपालीले समर्थन गर्नुपर्ने नेता रावलको भनाइ छ ।

रावलले सामाजिक सञ्जालमा लेखेका छन् ‘भारतमै विवादास्पद ‘आदिपुरुष’मा जानकी सीताको जन्मथलोसम्बन्धी गलत संवाद नेपालमाथिको सांस्कृतिक अतिक्रमण भएकाले त्यसलाई मूल भागबाट हटाउन र नहटाए काठमाडौंमा भारतीय चलचित्रमा रोक लगाउने नगर प्रमुख बालेन्द्र शाहको निर्णय उचित छ । उहाँलाई धन्यवाद दिँदै सबै देशभक्त नेपालीले समर्थन गरौँ।’

यता हलवालाहरुले पनि सोमबारबाट प्रदर्शन रोक्ने भएका छन् । हलहरूको छाता संगठन चलचित्र संघले दर्शकको सुरक्षाको निम्ति सोमबारदेखि ‘आदिपुरुष’ को प्रदर्शन रोक्ने भएको हो ।