काठमाडौं । हरिहजुर थापा नेपाली पुरुष राष्ट्रिय भलिबल टोलीकाे दशौं कप्तान बनेका छन् । नेपाल भलिबल संघले उनलाई कप्तानको रुपमा चयन गरेको हो ।

यसअघि नेपाली टोलीका नियमित कप्तान इम रानामगर बाहिरिएसँगै थापाले कप्तानीको अवसर गर्न पाएका हुन् ।

उनी सन् २०१५ देखि निरन्तर रूपमा टोलीका मुख्य खेलाडीका रूपमा रहँदै आएका छन् । अब नेपालले हरिहजुरको कप्तानीमा नेसन्स लिग खेल्ने छन् ।

काभा पुरुष भलिबल नेसन्स लिग खेल्न नेपाली टोली शुक्रबार बिहान किर्गिस्तान प्रस्थान गरेका छन् । नेपाली टोलीलाई नेपाल भलिबल संघले बिहीबार नै बिदाइ गरेको थियो ।

काभा नेसन्स लिगमा नेपालसहित ७ टोलीले सहभागिता जनाउने भएका छन् । प्रतियोगितामा नेपालसँगै आयोजक किर्गिस्तान, पाकिस्तान,उज्वेकिस्तान, काजकिस्तान, इरान र तुर्किमिनिस्तान रहेको छ ।