काठमाडौं । पूर्व प्रधानमन्त्री तथा नेपाल समाजवादी पार्टीका अध्यक्ष डा. बाबुराम भट्टराईले कोही एक्लै वा सपरिवार कुनै धार्मिक स्थल जाँदा प्रश्न उठाउन नमिल्ने बताएका छन् ।

शनिबार साँझ प्रधानमन्त्री पुष्पकमल दाहाल प्रचण्ड पशुपतिनाथ पुगेपछि उनले यस्तो टिप्पणी गरेका हुन् । उनले कोही एक्लै वा सपरिवार कुनै धार्मिक स्थल जानु उसको निजी आस्थाको कुरा भएको बताए ।

तर जब पूरै मन्त्रीमण्डल एकैसाथ र एउटा शृंखलामा धार्मिक स्थल जान्छ त्यो राजनीति हुन्छ र प्रश्न उठ्छ उनले भनेका छन् ।

‘कोही एक्लै वा सपरिवार कुनै धार्मिक स्थल जॉदा प्रश्न उठाउन मिल्दैन,’ उनले सामाजिक सञ्जालमा उल्लेख गरेका छन्, ‘त्यो उसको निजी आस्थाको कुरा हो ! तर जब पूरै मन्त्रीमण्डल एकैसाथ र एउटा शृंखलामा धार्मिक स्थल जान्छ त्यो राजनीति हुन्छ र प्रश्न उठ्छ !’

भारत भ्रमणका क्रममा जेठ १९ मा मध्य प्रदेशको उज्जैनमा रहेको महाकालेश्वरमा प्रचण्डले पूजा गरेका थिए । त्यहाँको जल बोकेर प्रचण्ड शनिबार पशुपति पुगेका हुन् ।

शनिबार अर्थमन्त्री डा. प्रकाश शरण महत, परराष्ट्र मन्त्री एनपी साउद, उर्जा मन्त्री शक्ति बस्नेत, संस्कृति तथा नागरिक उड्डयन मन्त्री सुदन किराती सहभागी टोलीले पशुपति नाथ मन्दीरको अवलोकन गरेका थिए ।