काठमाडौं । प्रधानमन्त्री पुष्पकमल दाहाल ‘प्रचण्ड’ ले भारत भ्रमणको क्रममा जमिन सट्टापट्टाको कुरा नगरेको बताएका छन् ।

आज (बुधबार) राष्ट्रिय सभामा सार्वजनिक महत्वका विषयमा जवाफ दिँदै प्रधानमन्त्री प्रचण्डले भारत भ्रमणका क्रममा बंगलादेशको मोडल अध्ययन गरेर त्यसलाई पनि विकल्पको रुपमा लिन सकिन्छ भनेको बताएका हुन् ।

उक्त कुरा नेपालमा सीमाविदहरुले लामो समयदेखि उठाउँदै आएको पनि उनले स्पष्ट पारे ।

प्रधानमन्त्री प्रचण्डले भने, ‘मैले औपचारिक कुनै पनि बैठकमा जमिन सट्टापट्टाको कुरा गरेकै छैन र गरेको होइन । खाली कालापानी लिपुलेक र लिम्पियाधुरा नेपालको हो, त्यो समस्या छिटोभन्दा छिटो वार्ता र संवादद्वारा हल गर्नपर्छ मात्रै भनेको हो ।’

उनले सट्टापट्टा मोडलको आविष्कार आफूले नगरेको र सट्टापट्टाको बारेमा भारत सरकारसँग कुनै पनि औपचारिक संवाद नभएको दाबी गरे ।

साथै प्रधानमन्त्री प्रचण्डले भारतको नयाँ संसद भवनमा नेपालको भूमिसमेत सामेल गरिएको नक्साबारे आफूले कुरा नउठाएको भन्ने कुरा साँचो नभएको भन्दै सो विषयमा भारतसँग अझ बढी अध्ययन र छलफल गर्ने आश्वासन समेत दिए ।