काठमाडौं । प्रधानमन्त्री पुष्पकमल दाहाल ‘प्रचण्ड’ले संसद्‌मा दुई दुईपटक पारित गरेर पठाएको नागरिकता विधेयक प्रमाणीकरण नगरेर तत्कालीन राष्ट्रपतिबाट संविधान मिचिएको बताएका छन् ।

सोमबार बसेको प्रतिनिधिसभा बैठकमा सांसदहरूको प्रश्नको उत्तर दिँदै प्रधानमन्त्री प्रचण्डले यस्तो बताएका हुन् । प्रधानमन्त्री प्रचण्डले नागरिकता विधेयक प्रमाणीकरण नगरेर राष्ट्रपतिबाट संविधान मिचिएको बताए ।

प्रधानमन्त्री प्रचण्डले भने,’नागरिकतासम्बन्धी विधेयक संसद्बाट पारित भएर राष्ट्रपति कहाँ प्रमाणीकरणका लागि गएको थियो । तर, राष्ट्रपतिज्यूले त्यसलाई होल्डमा राख्नुभयो । त्यतिबेला पनि कुरा उठेको थियो। संविधानको संरक्षकले नागरिकता विधेयक फिर्ता गर्नुभयो । सो विधेयक प्रमाणीकरण गर्नुभएन ।’

संघीय संसद्को दुवै सदनले दुईपटक पारित गरेर प्रमाणीकरण गर्न पठाएको नागरिकता विधेयक रोकेर तत्कालीन राष्ट्रपति विद्यादेवी भण्डारीले संविधान मिचेको बताए ।

मिचिएको संविधानलाई ट्रयाकमा ल्याउन वर्तमान राष्ट्रपतिबाट नागरिकता विधेयक प्रमाणीकरण भएको प्रधानमन्त्री प्रचण्डको भनाइ छ ।