काठमाडौं। नेकपा एमालेका सांसद ठाकुर गैरेले भारतको संसद् भवनको नक्सामा नेपालको भुमी समेटेको विषयमा कुरा गर्न सरकारको ध्यानाकर्षण गराएका छन् ।

सांसद गैह्रेले पूर्वाधार विकास समितिको बैठकमा सहभागी ऊर्जा, जलस्रोत तथा सिँचाइ मन्त्री शक्तिबहादुर बस्नेतलाई ध्यानाकर्षण गराएका हुन् ।

बैठकमा सहभागी मन्त्री बस्नेतलाई उनले भारतले आफ्नो संसद् भवनको नक्सामा नेपालको लुम्बिनी राखेको जानकारी गराउँदै क्रममा त्यसबारे नेपालको तर्फबाट आफ्नो कुरा राख्न आग्रह गरे ।

जवाफमा मन्त्री बस्नेतले भारतीय संसद भवनको नक्सा नेपाल सरकारको नोटिसमा रहेको बताएका छन् । मन्त्री बस्नेतले भारतको नक्सामा नेपालको कपिलवस्तु र लुम्बिनी पनि राखिएको विषयमा जानकार भएको बताए ।

भारतको बिहारमा पनि त्यही नाम गरेको ठाउँ रहेको भन्ने भारतीय पक्षको कुरा रहेको बताउँदै सांसद गैह्रेले राखेको कुरामा भारतीय पक्षलाई राख्ने प्रतिबद्धता जनाएका छन् ।

यस विषयमा पूर्वप्रधानमन्त्री डा.बाबुराम भट्टराईले पनि टिप्पणी गर्दै भारतीय नेतृत्वले स्पष्ट पार्नु पर्ने बताएका थिए । समितिको बैठकमा समितिको आन्तरिक कार्यविधि बनाउने विषयमा सांसदहरूले छलफल गरेका छन् ।