काठमाडौं । प्रमुख प्रतिपक्षी दल नेकपा एमालेले प्रतिनिधि सभाको बैठक अवरोध गरेपछि नेकपा माओवादी केन्द्रले संसद्लाई व्यवस्थित ढङ्गबाट अगाडि बढाउन सहयोग गर्न आग्रह गरेको छ ।

नेकपा माओवादी केन्द्रका प्रमुख सचेतक हितराज पाण्डेले सार्वभौम संसदमा सबैले आफ्नो कुरा राख्न पाइने बताए ।

उनले भने, ‘भ्रष्टाचार भइरहेको विषयलाई छानबिन गर्नुपर्ने हुन्छ । सरकारले आफ्नो कुरा राख्छ । आज प्रधानमन्त्रीले जवाफ दिने कार्यक्रम छ । उहाँले आफ्नो कुरा राख्नुहुन्छ ।’

सत्ता पक्षका सांसदहरूले प्रतिपक्षी दलका नेताले भ्रष्टाचार गरेको भनेर निराधार आरोप लगाएको भन्दै एमाले सांसदहरूले बैठकमा अवरोध सिर्जना गरेपछि बैठक २० मिनेटका लागि स्थगित गरिएको छ ।

एमालेले भने प्रमुख प्रतिपक्षी दलको नेतालाई भ्रष्टाचारको आरोप लगाएको भन्दै सरकारबाट जवाफ नआएसम्म प्रतिनिधिसभा बैठक सञ्चालन गर्न नदिने बताएका छन् ।