काठमाडौं । सफा हिमाल अभियान-२०२३ अन्तर्गत चार वटा हिमालबाट ३४ हजार केजी भन्दा बढी फोहोर संकलन गरिएको छ ।

नेपाली सेना नेतृत्वको टोलीले सगरमाथा, ल्योत्से, अन्नपूर्ण र बरूणत्से हिमालबाट ३४ हजार १६६ केजी फोहोर संकलन गरेको हो ।

यो अभियान अन्तर्गत अहिलेसम्म आधा बाटोसम्मको फोहोर संकलन भएको टोलीले जनाएको छ ।

विश्वकै सबैभन्दा ठूलो हिमाल सरसफाइ कार्यक्रम मध्येको यो अभियानमा कोका–कोला फाउन्डेसनले प्रमुख दाताको रूपमा सहकार्य गरेको छ ।

२८ मार्चदेखि सुरु भएको यो अभियान ५ जुनमा सकिने छ । प्रत्येक वर्ष सयौं आरोही, शेर्पा र भरियाहरूको टोली यी हिमाल चढ्न जाँदा, चुचुरामा पुग्ने बाटोमा आफूसँगै बायोडिग्रेडेबल र नन–बायोडिग्रेडेबल फोहोर छोड्ने गरेकोले फोहोर व्यवस्थापनमा समस्या आउने गरेको छ ।