काठमाडौं। गृहमन्त्री रामबहादुर थापा ‘बादल’ले नवनियुक्त आईजीपी शैलेश थापा क्षेत्रीलाई बधाई तथा सफल कार्यकालको शुभकामना दिएका छन्।

गृह मन्त्रालयमा बिहीवार बिहान  गृहसचिव महेश्वर न्यौपानेले आईजीपी क्षेत्रीलाई दर्ज्यानी चिह्न लगाइदिएका थिए ।

त्यसपछि भेटघाट कार्यक्रममा गृहमन्त्री थापाले आईजीपी क्षेत्रीलाई भने – तपाईंको कार्यकालमा शान्ति, सुरक्षा,अमनचयन कायमगर्न उत्कृष्ट हुने विश्वास लिएकाे छु । मेराे पुर्ण साथ र समर्थन रहन्छ । तपाईंको ट्राक रेकर्डका आधारमा योग्य देखेर यो जिम्मेवारी दिएका हाैँ । समायोजन काम टुंगोमा छिटाे पुग्नेगरि काम गर्नु । राज्यले विकासलाई प्राथमिकतामा राखेकाे छ, त्यसका लागि शान्ति सुरक्षा अनिवार्य शर्त हाे , त्यसमा विशेष ध्यान दिनुहोस् ।’

गृहसचिव महेश्वर न्याैपानेले पनि बधाई तथा सफल कार्यकालकाे शुभकामना दिँदै टिमवर्कमा काम गर्न निर्देशन दिए । आईजीपी क्षेत्रीले आफु गृहमन्त्रालयप्रति आभारी रहेको भन्दै आफ्नाे कार्यकालमा इमान्दारीपुर्वक राज्यले दिएको जिम्मेवारीलाई पुरा गर्ने प्रतिवद्धता व्यक्त गरेका छन् ।