रौतहट । रौतहट प्रहरीले अवैधरुपमा नेपाल भित्र्याईको झण्डै एक हजार बोरा युरिया मल बरामद गरेको छ ।

भारतबाट अवैधरुपमा नेपाल भित्र्याई रौतहटको राजपुर नगरपालिका–५ स्थित स्कुल चोकका विभिन्न स्थानमा भण्डारण गरिएका मल प्रहरीले बरामद गरेको हो ।

जिल्ला प्रहरीको टोलीले अवैध रुपमा भित्र्याइएको मल छापा मारेर नियन्त्रणमा लिएको हो । मल नियन्त्रणमा लिई अनुसन्धान तथा कारबाहीको लागी गौर भन्सार कार्यालय ल्याउन लाग्दा स्थानीयले अवरोध गरेपछि केहीबेर स्थिति तनावपूर्ण बनेको छ ।

स्थिति नियन्त्रणमा लिन प्रहरीले चार राउण्ड अश्रुग्यास प्रहार गरेको छ । भारतबाट भित्र्याइएको मल कसको हो र घरधनी को हो भन्ने खुल्न बाँकी । मल धनीबारे प्रहरीले अनुसन्धान भैरहेको रौतहट प्रहरीले जनाएको छ ।

प्रहरीको टोलीले केही मल सदरमुकाम गौर ल्याइसकेको छ । मल ल्याउने क्रममा बाटोमा आगो बालेर स्थानीयले रोक्ने प्रयास गरेका थिए । त्यसपछि स्थानीयले प्रहरीमाथि ढुगांमुढा गर्न थालेका थिए ।