काठमाडौं । सहिद स्मारक ‘ए’ डिभिजन लिग फुटबल अन्तर्गत आज आइतबार चार खेलहरु हुँदैछन् ।

लिगको १३ औं चरण अन्तर्गत आइतबार अन्तिम चार खेलहरु हुनेछन् । जसमा दुई खेल दशरथ रंगशाला र दुई खेल एन्फा कम्प्लेक्स मैदानमा हुनेछ ।

वर्षा र खराब मौसमले शनिबार रोकिएका दुई खेल आइतबार पुरा हुनेछ ।

शनिबार हिमालयन शेर्पा क्लब र त्रिभुवन आर्मी क्लबबीचको खेल ७१ औं मिनेटमा रोकिएको खेलको बाँकी १९ मिनेटको खेल आइतबार दिउँसो साँढे ४ बजे दशरथ रंगशालामा हुनेछ ।

रंगशालामा आइतबार नै हुने दोस्रो खेलमा साँझ ६ बजे साविक विजेता मछिन्द्र फुटबल क्लब र सातदोबाटो युथ क्लबबीच प्रतिस्पर्धा हुनेछ ।

आइतबार एन्फा कम्प्लेक्स सातदोबाटोमा दुई खेल हुनेछ । दिउँसो १ बजे संकटा क्लब र जावलाखेल युथ क्लबबीचको बाँकी खेल हुनेछ । संकटा र जावलाखेलबीचको खेल शनिबार ५१ औं मिनेटमा स्थगित भएको थियो ।

एन्फा कम्प्लेक्समा आइतबार हुने दोस्रो खेलमा दिउँसो साढे ३ बजे चर्च ब्वाइज युनाईटेड र मनाङ मर्स्याङ्दी क्लब भिड्नेछन् ।