काठमाडौं । प्रधानमन्त्री पुष्पकमल दाहाल ‘प्रचण्ड’ले भूमिसम्बन्धी विद्यमान समस्या समाधानका लागि सरकार गम्भीर रहेको बताएका छन् ।

बिहिबार राष्ट्रिय भूमि आयोगका पदाधिकारीहरुसँग प्रधानमन्त्री निवास बालुवाटारमा भएको भेटमा यस्तो बताएका हुन् ।

उनले विद्यमान व्यवस्थामा क्रान्तिकारी निर्णय लिएर मात्रै वर्षौदेखि थाँती रहेका समस्याको प्याकेजमा समाधान सम्भव भएको बताए ।

प्रधानमन्त्री दाहालले सुकुम्बासी, अव्यवस्थित बसोबासीलगायत भूमिहीनका समस्या दीर्घकालीन रूपमा सम्बोधन गर्ने कामलाई प्राथमिकता दिन आयोगलाई निर्देशन समेत दिए ।

भेटमा भूमि व्यवस्था, सहकारी तथा गरिबी निवारणमन्त्री रञ्जिता श्रेष्ठ चौधरी, मन्त्रालयका सचिव डा दामोदर रेग्मी, राष्ट्रिय भूमि आयोगका अध्यक्ष केशव निरौला, उपाध्यक्ष नहेन्द्र खड्कालगायत आयोगका पदाधिकारीको उपस्थिति रहेको थियो ।