काठमाडौं । धरान उपमहानगरपालिकामा मेयर हर्क साम्पाङले वडाध्यक्षहरुको राजीनामा मागेका छन् ।

विवाद बढ्दै गएपछि मेयर साम्पाङले शुक्रबार एक निर्देशनात्मक विज्ञप्ति जारी गर्दै वडाध्यक्षहरुको राजीनामा मागेका हुन् ।

मेयर सम्पाङले जारी गरेको प्रेस विज्ञप्तिमा भनिएको छ, ‘कसैले ‘म बैठक बस्दिन’ भन्न पाइँदैन त्यसैले कर्तव्य पुरा नगरेको र जनताको काम गर्न असक्षम भएको घोषणा गर्दै बैठक बहिष्कार गर्ने जति सबैले नैतिकताको आधारमा तुरुन्तै राजीनामा दिएर बाटो प्रसस्त बनाई आम धरानबासी जनता र लोकतन्त्रलाई सहयोग गर्न अनुरोध छ।’

मेयर साम्पाङले समन्वय र सहमतिविना आफूखुसी काम गरेको । बैठकमा कसैलाई आफ्ना कुरा राख्न नदिएको भन्दै एक महिनाभन्दा बढी समयदेखि वडाध्यक्षहरू आन्दोलित छन् ।

यसअघि १ पुसमा पनि मेयर साम्पाङले कार्यपालिकासहित वडाध्यक्षहरुको राजीनामा मागेका थिए । मेयर साम्पाङले वडाहरुमा के कस्ता, के कति काम भएका छन तुरुन्तै सार्वजनिक गर्न वडाध्यक्षहरुलाई निर्देशन समेत दिएका छन् ।