काठमाडौं । रौतहटमा प्रहरीले चलाएको गोली लागेर एक जना घाइते भएका छन् ।

गरुडा नगरपालिकाको गरुडा बजारमा प्रदर्शनकारी र प्रहरीबीच भएको झडपमा गोली लागि वडा नम्बर ५ का २२ वर्षीय गजेन्द्र यादव घाइते भएका हुन् ।

जिल्ला प्रहरी कार्यालय रौतहटका अनुसार हातमा गोली लागेका यादवको उपचार भइरहेको छ । चार जना प्रदर्शनकारीलाई प्रहरीले पक्राउ गरेको छ ।

गरुडा बजारमा स्थिति तनावग्रस्त बनेपछि प्रहरीले १६ राउन्ड अश्रु ग्यास तथा गोली प्रहार गरेको छ । मेयरका उम्मेदवार रहेका दीपक यादवको टोलीले गरुडा नगरपालिकाको कार्यालयमा ताल्चा लगाउन खोजेपछि प्रदर्शनकारी र प्रहरीबीच झडप भएको थियो ।