काठमाडौं । प्रधानमन्त्री पुष्पकमल दाहाल ‘प्रचण्ड’ले अर्थतन्त्र चिन्ताजनक अवस्थामा नरहेको बताएका छन् ।

नेपाल चेम्बर अफ कमर्सको ७२ औं साधारण सभालाई सम्बोधन गर्दै प्रधानमन्त्री प्रचण्डले यस्तो बताएका हुन् ।

अर्थतन्त्रलाई सुधार ल्याई सामाजिक न्याय, सुशासन र समृद्धिको लक्ष्यमा तीव्रताका साथ अगाडि बढ्न सरकार प्रतिवद्ध रहेको भन्दै उनले निजी क्षेत्रको पूर्णसहयोगको विश्वास लिएको बताए ।

प्रधानमन्त्री प्रचण्डले भविष्यमा प्रेरणा लिन सक्ने परियोजना आगामी आर्थिक वर्षको नीति, कार्यक्रम र बजेटमा समेटिने बताए । यस्तै उनले रेमिट्यान्स आउने क्रम समेत बढेकाले अर्थतन्त्र हल्ला गरेजस्तो समस्याउन्मुख नरहेको बताए ।

परम्परागत सोचबाट माथि उठेर विगतभन्दा भिन्न, विगतभन्दा नयाँ, विगतभन्दा गुणात्मक केही नीति, कार्यक्रम र योजनाहरू अगाडि बढाउने गृहकार्य भइरहेको उनको भनाइ छ ।