काठमाडौं । सहरी विकास मन्त्रालयका सचिव सुरेश आचार्यले मन्त्रिमण्डल विस्तार अघि नै सहरी विकास तथा भवन निर्माण विभागका महानिर्देशक परिवर्तन गर्ने चलखेल गरेका छन् ।

१३औं नम्बरका कनिष्ट सहसचिव रविन्द्र बोहराको डिजाइनमा ७ महिनामै भवन विभागका महानिर्देशक परिवर्तन गर्नका लागि सचिव आचार्यले प्रधानमन्त्री पुष्पकमल दाहाल ‘प्रचण्ड’की छोरी गंगा दाहालको नाम समेत बद्नाम गर्दै बालुवाटारको दबाबमा गर्न लागेको भ्रम छरिरहेका छन् ।

सचिव आचार्य र बोहराको डिजाइनमा कुमार घिमिरेलाई महानिर्देशक बनाउन लागिएको छ । मन्त्रीपरिषद विस्तार अघि नै सचिव आचार्यले ठूलै आर्थिक चलखेलमा घिमिरेलाई महानिर्देशक बनउनेगरी बालुवाटार सेटिङ गरिसकेको भन्दै भ्रममा पारेका छन् ।

प्रधानमन्त्रीकी छोरीलाई करोडौं बुझाउनुपर्छ भन्दै सहरी विकास मन्त्रालयका परामर्शदाता र निर्माण ब्यवसायीसँग उठाउने जिम्मा विभागको विश्वबैंकको नेपाल शहरी शासकीय तथा पूर्वाधार आयोजना (NUGIP)  का आयोजना प्रमुख रविन्द्र बोहराले लिएका छन् ।

सचिव आचार्यले ठूलै आर्थिक लेनदेन गरी १२ जना बरिष्ठ सहसचिव हुँदाहुँदै १३ औं नम्बरका कनिष्ट सहसचिव बोहरालाई विश्व बंैकको एनयुजीआईपी आयोजनाका अलावा बन्चरेडाँडा ल्यान्डफिल साइट आयोजना र अधिकारसम्पन्न एकीकृत बागमती सभ्यता विकास समितिका आयोजना निर्देशक बनाएका छन् ।

तिनै बोहरामार्फत् सेटिङ गरी सहरी विकास मन्त्री आउनुअघि नै भवन विभागको महानिर्देशकमा कुमार घिमिरेलाई ल्याउने चलखेलमा सचिव आचार्य जोडतोडले लागेका छन् । जसमा करोडौंको चलखेल भएको स्रोत बताउँछ ।

कमजोर कार्यक्षमता भएका सचिव आचार्यलाई उनको कार्यशैली देखेर ४२ दिने सहरी विकास मन्त्री विक्रम पाण्डेले तपाई कसरी सचिव हुनुभयो भनी प्रश्न नै गरेका थिए । यस विषयमा सहसचिव रविन्द्र बोहोरासँग प्रतिकृया लिनका लागि उनको मोवाइलमा पटक–पटक सम्पर्क गर्दा उनी फोन काटेर सम्पर्कमा आउन चाहेनन् ।