काठमाडौं । सत्तारुढ दल नेपाल कम्युनिष्ट पार्टी (नेकपा) को स्थायी कमिटीको आजको बैठक स्थगित भएको छ ।

५ जना नेताहरूले धारणा राखेपछि बैठक स्थगित गरिएको प्रवक्ता नारायणकाजी श्रेष्ठले जानकारी दिए ।

बुधबारै निधन भएकी सांसद ज्ञानकुमारी छन्त्यालको निधनमा शोक व्यक्त गर्न प्रतिनिधिसभा बैठकमा जानुपर्ने भन्दै बैठक स्थगित गरिएको हो ।

आजको बैठकमा नन्द प्रसाई, पेशल खतिवडा, लिलामिण पोखरेल, योगेश भट्टराई र मातृका यादवले बोलेका थिए ।

प्रधानमन्त्रीले केही दिनअघि दिएको अभिव्यक्तिलाई दिएर शीर्ष नेताहरुले प्रधानमन्त्रीको राजीनामा माग गरेका छन् ।

नेताहरुले सरकार र पार्टी दुवैतर्फको नेतृत्वमा ओली असफल भएको भन्दै राजीनामा मागेपछि नेकपाभित्रको राजनीति जटिलतातर्फ प्रवेश गरेको छ ।

संकटमा परेका प्रधानमन्त्री ओलीले आज विहानै उपप्रधानमन्त्री ईश्वर पोखरेल, गृहमन्त्री रामबहादुर थापालगायत केही मन्त्री र नेताहरुलाई बोलाएर छलफल गरेका थिए ।

छलफलमा मन्त्री तथा नेताहरुले प्रधानमन्त्री ओलीलाई पार्टीको निर्णय मान्न सुझाव दिएका छन् ।

बैठक बिहीबार बिहान ११ बजे बस्ने बताइएको छ।