ललितपुर । प्रहरी महानिरिक्षक (आईजीपी) ठाकुर ज्ञवालीले महानगरीय प्रहरी परिसर, ललितपुरको नवनिर्मित व्यारेक भवनको उद्घाटन गर्दै गर्दा परिसरभित्रै हिरासतमा रहेका एक थुनुवाले भने आत्महत्या गरेका छन् ।

आज (बुधबार) विहान महानगरीय प्रहरी परिसरमा ललितपुरमा ब्यारेक भवन उद्घाटन कार्यक्रममा प्रमुख अतिथि आईजीपी ज्ञवाली, ललितपुर महानगरका मेयर चिरिबाबु महर्जनलगायत ३ जना एआइजी र केही डिआइजीहरुको पनि उपस्थिति रहेको थियो ।

४ तल्ले भवनको उद्घाटन गरेर प्रहरी आईजीपी ज्ञवालीले मन्तव्य राखिरहदाँ परिसरभित्रै हिरासत कक्षमा एक जनाले आत्महत्या गरेका हुन् ।

परिसरका प्रहरीहरुको ध्यान ब्यारेक उद्घाटनतिर जाँदा बलात्कारको मुद्दामा असार १४ गते ग्वार्कोबाट पक्राउ परेका २४ वर्षीय दुर्गेश यादवले आत्महत्या गरेको परिसर स्रोतले जनाएको छ ।

एक्लै बसेका यादववले हिरासत कक्षमा रहेको तन्दा च्यातेर झ्यालमा झुण्डिएर आत्महत्या गरेको प्रहरीले जनाएको छ।

यादवमाथि शारिरीक अपाङ्गता भएकी एक महिलालाई मकैबारीमा बलात्कार गरेको आरोप लागेको थियो ।

एकातिर दिन दिने प्रहरी अधिकारीहरु नै घुससहित पक्राउ पर्दै जानु र अर्कोतिर हिरासतभित्रै आत्महत्याका घटना बढ्दै जाँदा प्रहरीको कमाण्डिङ क्षमतामाथि नै प्रश्न उठ्दै आएको छ ।

एक सातापछि ३० वर्षे सेवाहदका कारण अवकाश पाउन लागेका आईजीपी ज्ञवालीको छोटो कार्यकालमा प्रहरी अधिकारीहरु नै घुस रकमसहित पक्राउ पर्दा संगठन प्रमुख ज्ञवालीमाथि पनि प्रश्न उठिहेको छ ।