काठमाडौं । विपिन कार्की र केकी अधिकारीको मुख्य भूमिका रहेको ‘प्रसाद-२’ का निर्माता सुवास थापाविरुद्ध चेक बाउन्स र ठगी गरेको आरोप लागेको छ ।

साढे ६२ लाख रुपैयाँ ठगीको आरोपमा व्यवसायी केशव पाण्डेले उनीविरुद्ध जिल्ला प्रहरी परिसर, काठमाडौंमा बैंकिङ कसुरको जाहेरी दर्ता गरेका हुन् ।

थापाले सुरुमा पाण्डेलाई निर्माताका रुपमा प्रसाद-२ मा भित्राएका थिए । तर पछि विवाद भएपछि थापाले प्रसाद २ बाट हात झिकेका थिए ।

व्यवसायी पाण्डेका अनुसार फिल्म निर्माण गर्ने र मुनाफाबाट आएको रकम बाँड्ने भनेर आफूलाई प्रलोभनमा पारी थापाले एक वर्षअघि उक्त रकम लगेको तर पटकपटक ताकेता गर्दा पनि रकम फिर्ता नगरेकाले जाहेरी दिइएको हो ।

निर्माता थापाले नेपाल इन्भेष्टमेन्ट बैंक, कालिमाटी शाखामा रहेको खाताको चार वटा चेक दिएको तर साट्न जाँदा पर्याप्त मौज्दात रकम नभएकाले आफूलाई झुक्याएको उनको भनाई छ ।

प्रमाणसहित उजुरी आएपछि दर्ता गरेर कानुन प्रक्रिया अघि बढाइएको जिल्ला प्रहरी परिसर काठमाडौंले जनाएको छ ।आन्तरिक लफडाका कारण ‘प्रसाद २’ पटकपटक विवादमा पर्दै आएको छ ।