काठमाडौं । नेकपा एमालेका अध्यक्ष केपी शर्मा ओलीले कुण्ठाग्रस्त समूहविरुद्ध एक्लै भए पनि विचार प्रवाह गरिरहनु पर्ने बताएका छन् ।

एमालेनिकट बुद्धिजिवी परिषद्को केन्द्रीय समिति बैठकलाई शनिबार सम्बोधन गर्दै अध्यक्ष ओलीले यस्तो बताएका हुन् ।

ओलीले भने, ‘सयजना विरोधीले एकैपटक आक्रमण गरे भने नआत्तिनुस्,तपाईको विचारबाट उनीहरु तर्सिए,आत्तिए र एकैपटक आक्रमण गर्न संगठित ढंगले सक्रिय भएका हुन् । नकारात्मक टिप्पणीको बाढी आउनु भनेको तपाईंका विचारसँग आत्तिएर उनीहरु खनिएका हुन् ।’

उनले विरोधी जमातले संगठित र सक्रिय ढंगले सामाजिक संजालबाट एकैपटक आक्रमण गर्न सक्ने भए पनि त्यसबाट आत्तिन नहुने बताए ।

ओलीले आजको सोसल मिडिया र आर्टिफिसियल इन्टेलिजेन्सलाई प्रयोग गरेर बौद्धिक जगतमा हाबी हुन बुद्धिजिवीहरुलाई आग्रह गरे ।

अध्यक्ष ओलीले एमालेनिकट बुद्धिजिवीहरुलाई तयारीका साथ संगठित भएर गलत विचारविरुद्ध सही विचार प्रवाह थाल्न आग्रह गरे ।

उनले त्यसो गर्दा नकारात्मक कमेन्ट आए भने आफू सही ठाउँमा छौं भन्ने बुझ्नुपर्ने बताए ।